హిందువులు సంఘటితం కావాలి..

- మతాలు వేరైనా అందరి దేవుడొక్కడే 

- శ్రీ పీఠం అధిపతి పరిపూర్ణానంద స్వామీజీ

- బాలికలను చిన్నచూపు చూడొద్దు

- నమస్తే తెలంగాణ డైరెక్టర్ విజయరాజం

కరీంనగర్ (మార్చి 19):  అందరి దేవుడొక్కడేనని, మతాలే వేరని శ్రీ పీఠం అధిపతి పరిపూర్ణానంద స్వామీజీ అన్నారు. ధర్మ జాగరణ సమితి కరీంనగర్ శాఖ అధ్వర్యంలో మంగళవారం కరీంనగర్‌లో నిర్వహించిన ‘హిందూ శంఖారావం’కు ఆయన ముఖ్య అతిథిగా హాజరయ్యారు. వేములవాడ శ్రీ రాజరాజేశ్వర స్వామి దేవాలయ పాలక మండలి సభ్యురాలు, నమస్తే తెలంగాణ దినపత్రిక డైరెక్టర్ విజయరాజంతో కలిసి జ్యోతి ప్రజ్వలన చేశారు. ఈ సందర్భంగా స్వామీజీ మాట్లాడుతూ అన్ని మతాలను గౌరవించేదే హిందూ మతమని పేర్కొన్నారు. హిందువులు ఆదరిస్తేనే ఇతర మతాలు మనగలుగుతున్నాయని, అందుకు బదులుగా వారు దానవత్వాన్ని ప్రదర్శిస్తున్నారని పేర్కొన్నారు. ఎవరికీ హాని చేయని మతం హిందూ మతమని అన్నారు. దేశంలో అతి పెద్ద మతంగా గుర్తింపు పొందిన హిందూ మతస్తులపై కొన్ని మతాల వారు మత మార్పిడికి పాల్పడుతుండగా, మరి కొందరు బాంబులతో దాడి చేస్తూ మారణకాండ సృష్టించడం ఎంత వరకు సమంజసమని ప్రశ్నించారు. ఏఐఎంఐఎం శాసనసభా పక్ష నేత అక్బరుద్దీన్ ఒవైసీ హిందువులపై అనుచిత వ్యాఖ్యలు చేయడాన్ని ఖండించారు. గో మాంసం తినాలని, 15 నిముషాల సమయం ఇస్తే హిందువులను ఊచకోత కోస్తానని అనడం బాధాకరమని పేర్కొన్నారు. ఆయన చేసిన వ్యాఖ్యలు దేశవ్యాప్తంగా దుమారం రేపడంతో కటకటాలు లెక్కించాడని, తాను అలా అనలేదని మాట మార్చడం సబబు కాదన్నారు.

       అక్బరుద్దీన్‌కు శరీరంలో బుల్లెట్లు దిగినప్పుడు, కత్తి గాయాలైనప్పుడు వైద్యం అందించింది హిందూ ఆస్పవూతేనని, హిందు వైద్యులేనని అన్నారు. ఒవైసీ ఆసుపత్రి ఉన్నప్పటికీ నమ్మకం లేకనే హిందూ ఆస్పత్రి లో చేరి ఆరోగ్యం మెరుగుపరుచుకున్నారని గుర్తు చేశారు. మతాన్ని మతంగానే చూడాలని, మతాన్ని రాజకీయాల్లోకి లాగొద్దని సూచించారు. హైదరాబాద్ దిల్‌సుఖ్‌నగర్‌లో బాంబులు పెట్టి ముస్లింలు, హిందువులు, క్రైస్తవుల మృతికి కారకులయ్యారని, ఇక్కడ మరణించింది మతం కాదని మానవులని అన్నారు. మానవత్వం లేనప్పుడు దైవత్వమెందుకని అన్నారు. హిందువులందరూ ఒకే గొడుగు కిందకు ‘హిందూ సమాజం’లోకి రావాలని పిలుపునిచ్చారు. సంఘటితంగా ఉంటూ దేశాన్ని కబళించాలని చూసే దుష్ట శక్తులను పారదోలాలని అన్నారు. విజయ రాజం మాట్లాడుతూ మహిళగా జన్మించినందుకు మహిళలు గర్వపడాలని అన్నారు. సమాజంలో మహిళలకు ప్రత్యేక స్థానముందని, బాలికలను చిన్న చూపు చూడవద్దని సూచించారు. ప్రతి ఇల్లాలు ఇంటిని రక్షించుకున్నట్లే సమాజాన్ని రక్షించుకోవాలని పిలుపునిచ్చారు. హిందూ ధర్మ ప్రచారకులు శ్రీనివాసానంద స్వామీజీ మాట్లాడుతూ భారతీయులమని గర్వంగా చెప్పుకోవాలని, మాతృభాషను ప్రేమించాలని, హిందువుగా జీవించాలని అన్నారు. హిందూ శంఖారావం హైందవ జాతికి మేలుకొలుపు కావాలన్నారు. దేశ రక్షణే మనకు ఊపిరి కావాలని పేర్కొన్నారు.

            తల్లిదండ్రులను మించిన దైవం లేదని, దేశ సేవను మించిన భాగ్యం మరొకటి లేదని చెప్పారు. హిందువులపై ఇతర మతాల వారు రెచ్చగొటే ప్రసంగాలు చేయడం సరికాదన్నారు. హిందూ ధర్మ ప్రచారకులు ప్రమోద్ చైతన్య మాట్లాడుతూ అన్ని మతాలు సమానమేనని, దుష్ట సంస్కృతికి పాల్పడే వారి బుద్ధిని మార్చే ప్రయత్నం చేయాలని అన్నారు. దుర్మార్గులను సన్మార్గంలో నడిపించాలన్నారు. సహనానికి మారు పేరు హిందువులన్నారు. డాక్టర్ బాచంపల్లి సంతోష్‌కుమార శాస్త్రి, స్వదేశీ జాగరణ్ మంచ్ ప్రాంతీయ కార్యదర్శి అప్పాల ప్రసాద్ తదితరులు మాట్లాడారు. అప్పాల ప్రసాద్ రచనలో వెలువడిన వివేకానందుడి పాటల సీడీని పరిపూర్ణానంద స్వామి ఆవిష్కరించారు. సినీ రచయిత జేకే భారవి మాట్లాడుతూ ఇక్కడి మట్టి గొప్పదని, దేశానికే హిందూ శంఖారావం సభ మోడల్ సభగా మారిందన్నారు. ఆదిశంకరాచార్య సినిమా నిర్మించానని, దాన్ని ఆదరించాలని కోరారు. ధర్మ జాగరణ సమితి ప్రతినిధి బండి సంజయ్‌కుమార్ ఆధ్వర్యంలో నిర్వహించిన హిందూ శంఖారావంలో జిల్లా నలుమూలల నుంచి హిందువులు, నగర ప్రముఖులు, వేద పండితులు, వైద్యులు, వీహెచ్‌పీ, ఏబీవీపీ కార్యకర్తలు పాల్గొన్నారు. నంది శ్రీనివాస్ వ్యాఖ్యాతగా వ్యవహరించారు. 

హిందూ మతంలో చేరిన క్రైస్తవ కుటుంబం:

ఐదు తరాలుగా క్రైస్తవులుగా ఉంటున్న రామడుగు మండలం కొరటపల్లి గ్రామానికి చెందిన మన్నె సురేందర్ కుటుంబం హిందూ మతంలోకి మారింది. సురేందర్ ఇంటి నిర్మాణం కోసం పునాదులు తవ్వుతుండగా శివలింగం బయల్పడడంతో ఆయనలో మార్పు వచ్చింది. దీంతో పాస్టర్‌గా ఉన్న ఆయన పరిపూర్ణానంద స్వామి సమక్షంలో హిందూ మతంలో చేరారు.